Kubada Zika virusining boshqa mamlakatlardan kirib kelishi bilan bog‘liq to‘qqizinchi holat qayd etildi. Bu haqda, mamlakat sog‘liqni saqlash vazirligi ma’lumotiga tayanib, “TASS” xabar berdi.
Virus Venesuelada yashovchi Gavana provinsiyasi fuqarosida aniqlangan. Bemor 4-aprel kuni Venesuela hududida ilk bor holsizlikni his qilgan. Keyingi kunlarda kasallikning yengil alomatlari kuzatilgan. 8-aprel kuni u Kubaga yetib kelib, Pyer Kyuri nomidagi Tropik tibbiyot institutiga murojaat qilgan. 12-aprel kuni erkakning tahlil natijalarida Zika virusining mavjudligi aniqlangan.
Bu Zika bezgagining mamlakatga Venesueladan kirib kelishi bilan bog‘liq yettinchi holatdir. Yana ikki nafar virus tashuvchisi Kubaga Braziliyadan kelgandi.