Janubiy Osetiya hukumati Rossiya tarkibiga kirish haqidagi referendumni shu yilning avgustigacha o‘tkazishni rejalashtirmoqda. Bu haqda respublika prezidenti Leonid Tibilovga tayanib, “TASS” xabar berdi.

U ovoz berish natijalariga shubhalanmasligini ta’kidladi. “Biz javobni olamiz, men yuz foiz aminmanki, xalq ‘ha’ deydi, va biz xotirjamlik bilan Rossiya oliy rahbariyatiga murojaat qila olamiz”, — dedi Tibilov.

Uning aniqlik kiritishicha, referendumda respublika Konstitutsiyasining 10-moddasini o‘zgartirish haqidagi savol beriladi. Unda Janubiy Osetiya boshqa davlatlar bilan ittifoqqa kirishish va ittifoq organlariga o‘z vakolatlarining bir qismini berish huquqiga ega ekanligi aytiladi. Referendumda ushbu moddani Janubiy Osetiyada vakolatlarining bir qismini Rossiyaga o‘tkazish huquqi borligi haqidagi xatboshilar bilan to‘ldirish masalasi ko‘tariladi.