O‘zbekistonda xizmat ko‘rsatgan madaniyat xodimi, taniqli suxandon Muslimbek Yo‘ldoshev Facebook ijtimoiy tarmog‘idagi sahifasida marhum hamkasblari xotirasiga bag‘ishlab yozilgan she’rini e’lon qildi, deya xabar beradi “Darakchi.uz”.
Suxandon marhum hamkasbi va yaqin do‘sti Abdumo‘min O‘tbosarovning vafot etganiga 100 kun to‘lganini ma’lum qilib, bag‘ishlovda uni va O‘zbekiston Milliy teleradiokompaniyasida faoliyat yuritgan Mirzohid Rahimov, Rahmatilla Mirzayev, O‘ktam Jobirov, Davron Zunnunov, Halima Yusupova kabi suxandonlarni xotirladi.
Yana qaytar gulgun bahorlar,Qaytmas mening qadrdonlarim.Bu gullar dilimga ozorlar,Qayda otam, onajonlarim.
Novdalarda yashnagan bodroq,Chakkamda oq, dil fig‘onlarim.Uchib tushgan har bir gulyaproq,Yaqinlarim, jigarjonlarim.
Boshim uzra vizillar varrak,Chayqaladi birga qonlarim.Bu - ketganlar ruhidan darak,Bevaqt ketgan do‘st-yoronlarim.
Yugurgilar buzib olamni,Ko‘zim nuri bolajonlarim.Eshitmaydi ko‘ngil nolamni,Qo‘msaganim gulxandonlarim.
Armon bu bir to‘lmas tubsizlik,Yetmas unga dil vayronlarim.Kengaymoqda har kun yolg‘izlik,Ko‘paymoqda g‘uj armonlarim.
Qanday lobar, qanchalar latif,Chehrangiz xush, o‘t zabonlarim.Qay makonni shodon gullatib,Yuribsizlar suxandonlarim?
Abdumo‘min va Rahmatullo,Usta O‘ktam va Davronlarim.Halima, Mirzohid, yo, Olloh,Qayda birga bo‘lgan onlarim?
Qaytaverar bu bahor gulgun,Qaytaverar, kelmay qolmaydi.Ammo qaytmas, ketganlar butkul,O‘ksik dilim endi to‘lmaydi.
Sizlar bilan edi shodligim,Sizga edi obro‘, shonlarim.Sizsiz tatirmikin borligim,Ko‘p sog‘indim, asl jonlarim.
Yana qaytar gulgun bahorlar...Qaytmaysiz a, qadrdonlarim?
Izoh (0)