Futbol bo‘yicha Osiyo Chempionlar Ligasi guruh bosqichining 4-turida Qarshining “Nasaf” klubi o‘z maydonida Qatarning “Al-Jaish” jamoasini mag‘lub eta olmadi. “Championat.asia” o‘yindan keyin “Nasaf” bosh murabbiyi Ro‘ziqul Berdiyevning matbuot anjumanidagi fikrlarini taqdim etdi.
“O‘z o‘yinimizni ko‘rsata oldik, biroq kutilgan natija qo‘lga kiritilmadi. Tezkor gol kiritib, raqib rejasini buza olmadik. E’tirozim hujum chizig‘i vakillariga bo‘ldi. Bobur Abduxoliqovni boshlang‘ich tarkibga kiritmay adashdim, deya olmayman. Umuman, hujumdagi muammolar haqida bir necha yildan buyon so‘z yuritiladi. Yuqori saviyadagi hujumchi sotib olish uchun moliyaviy imkoniyatimiz yo‘q. Kelgusida bu masalani rahbariyat oldiga qo‘yaman”, — deydi Ro‘ziqul Berdiyev.
Uchrashuv davomida “Nasaf” futbolchilari to‘pni juda ko‘p yo‘qotib qo‘yganiga ham bosh murabbiy o‘z e’tiborini qaratdi: — “O‘yin davomida oddiy vaziyatlarda to‘pni ko‘p yo‘qotdik. Bu hayajon bilan bog‘liq. To‘p bilan muomala qilishda eng yaxshi futbolchimiz Bahrom Abdurahimov ham ko‘p xato qildi. Bugun u eng yomon o‘yinini o‘tkazdi. “Obod”ga qarshi uchrashuvda olgan kichik jarohati bunga sabab bo‘lsa kerak”.“Guruh bosqichida 2-o‘rin uchun kurash davom etadi. Jamoamiz guruhda qolib ketsa, bundan uyalmaymiz. Biz sharmanda bo‘ladigan o‘yin ko‘rsatmadik”, — deya fikrini yakunladi “Nasaf” klubi bosh murabbiyi.
Izoh (0)