Malaysia Airlines aviakompaniyasining 2014-yilda yo‘qolib qolgan layneriga tegishli deb taxmin qilinayotgan bo‘laklar Hind okeanidagi oroldan topildi, deb yozadi “RBK”. Ushbu ma’lumotni Malayziya fuqarolik aviatsiyasi departamenti rahbari Ajaruddin Abdul Rahmon tasdiqladi.
Detalni Mavrikiy Respublikasiga tegishli oroldan topishdi. “Biz bu nimaligini hozircha bilmaymiz. Mavrikiy aviatsiya hukumati bo‘laklarni o‘z muhofazasi ostiga olishini kutishimiz kerak”, — dedi Rahmon.
Malayziya qo‘liga bo‘laklarning sifatli suratlari kelib tushgach, hukumat keyingi harakat rejasini tuzadi.
Eslatib o‘tamiz, Kuala-Lumpurdan Pekinga yo‘l olgan va bortida 227 nafar yo‘lovchi, 12 nafar ekipaj a’zosi bo‘lgan layner 2014-yil, 8-martga o‘tar kechasi g‘oyib bo‘lgan. Havo kemasi Hind okeanining janubiy qismiga qulagani taxmin qilinadi, biroq hozirgacha buning dalillari topilmagan.
Izoh (0)