AQShda kattaligi bo‘yicha uchinchi o‘rinda turadigan Chikago maktab okrugining (Illinoys shtati) 27 ming nafar o‘qituvchisi 1-aprel, juma kuni bir kunlik ish tashlash o‘tkazdi. Bu haqda “TASS” xabar bermoqda.
Ish tashlash sababli 400 mingga yaqin o‘quvchi darslardan qoldi. Shahar rasmiylari bolalar vaqtini o‘tkazishi uchun kutubxonalar va cherkov binolarida 250 ta vaqtincha markaz ochishga majbur bo‘ldi.
Chikago o‘qituvchilar uyushmasi tashkil etgan ish tashlashga shahar va shtat rasmiylari bilan maktab dasturlarini moliyalashtirish bo‘yicha yangi kelishuv yuzasidan natijasiz muzokaralar sabab bo‘ldi. Hozir amalda bo‘lgan kelishuv muddati iyunda yakuniga yetadi. Illinoys rasmiylari salkam 9 oydan beri shtat budjetini tasdiqlay olmaydi, bu esa bir qator ijtimoiy dasturlar to‘xtab qolishiga olib keldi.
Izoh (0)