JCh—2018 saralash. Edinson Kavanining goli Urugvay terma jamoasini Janubiy Amerika mintaqasida 1-o‘ringa olib chiqdi

Futbol bo‘yicha 2018-yil Rossiyada bo‘lib o‘tadigan jahon chempionati uchun kurash olib borayotgan Janubiy Amerika terma jamoalari 30-mart kuni tongda saralashning 6-tur uchrashuvlarini yakunladi. Bu haqda “Sports.ru” xabar bermoqda.

5-turga qadar peshqadam bo‘lib kelayotgan Ekvador birinchi mag‘lubiyatini Kolumbiya terma jamoasidan qabul qilib oldi. Gustavo Kinteros jamoasi so‘nggi daqiqada kiritilgan gol evaziga yirik mag‘lubiyatdan qutulib qoldi.

Ekvadorning ochko yo‘qotishidan unumli foydalangan Urugvay terma jamoasi o‘z maydonida Peruni mag‘lub etib, saralash turnir jadvalining 1-pog‘onasiga ko‘tarildi.

Dunga murabbiyligidagi Braziliya terma jamoasi o‘tgan turda Urugvayni 2 ta gol farqi bilan yenga turib, yakunda g‘alabani saqlab qola olmagandi. Bu safar pentakampionlar iroda ko‘rsatib, 2 ta gol farqini yo‘qqa chiqara oldi.

6-turdan keyin jamoalar turnir jadvalida quyidagi ketma-ketlikda joylashgan: Urugvay — 13 ochko, Ekvador — 13, Argentina — 11, Chili — 10, Kolumbiya — 10, Braziliya — 9, Paragvay — 9, Peru — 4, Boliviya — 3, Venesuela — 1.

JCh—2018 saralashi Janubiy Amerika 6-tur uchrashuvlari

Kolumbiya — Ekvador 3:1 (1:0)

Urugvay — Peru 1:0 (0:0)

Venesuela — Chili 1:4 (1:1)

Argentina — Boliviya 2:0 (2:0)

Paragvay — Braziliya 2:2 (1:0)