O‘zbekiston Markaziy banki 10 ming so‘mlik kupyura muomalaga chiqarilishi haqida ijtimoiy tarmoqlarda tarqalgan xabarlarni rad etdi

O‘zbekistonda 10 ming so‘mlik kupyura muomalaga chiqarilishi haqida ijtimoiy tarmoqlar va messenjerlarda tarqalgan xabarlar haqiqatga mos kelmaydi. Bu haqda O‘zbekiston Markaziy banki matbuot xizmati “Daryo”ga ma’lum qildi.

So‘nggi bir necha kundan beri ommabop ijtimoiy tarmoqlar va messenjerlarda go‘yoki yaqin vaqt ichida muomalaga chiqariladigan 10 ming so‘mlik deya e’tirof etilayotgan kupyura tasvirlangan suratlar tarqalmoqda.

Qizg‘ish kupyuraning old tomoniga O‘zbekiston gerbi tasviri tushirilgan va lotin alifbosiga asoslangan o‘zbek yozuvida “10 000 so‘m” deb yozilgan, orqa tomonida esa Shahrisabzdagi Oqsaroy maydoni surati va “Amir Temur tavalludining 680 yilligi” yozuvi bor.

Ma’lumot uchun, hozirgi vaqtda o‘zbek so‘mining eng katta qiymatli kupyurasi 5 000 so‘m hisoblanadi. Mazkur kupyura 2013-yil 1-iyuldan muomalaga chiqarilgan. Bundan tashqari, 1994-yildan beri 1, 3, 5, 10, 25, 50, 100, 200, 500 va 1000 so‘mlik kupyuralar ham muomalaga chiqarilgan.

“Daryo”ning YouTube’dagi rasmiy sahifasiga obuna bo‘ling