Janubiy Koreyaning fuqarolar ishlari bo‘yicha sudi 24-mart, payshanba kuni Shimoliy Koreya yetakchisi Kim Chen Inning xolasi tomonidan KXDRlik xoinlarga qarshi berilgan tuhmat haqidagi da’vosini rad etdi, deb yozadi “RIA Novosti”.
Ko Yon Suk 2015-yil dekabrida Seul markaziy okrug sudiga da’vo arizasini bergan edi. Uning da’vo qilishicha, 1990-yillarda KXDRdan qochib ketib, Janubiy Koreyada yashayotgan uch kishi u va oilasi haqida ommaga, xususan, televizion shou vaqtida, yolg‘on xabar tarqatgan.
Sud bayonotida aytilishicha, Ko Yon Sukning huquqshunoslari uchala javobgarning manzillarini taqdim etish bo‘yicha ko‘rsatmani bajarmagani, shuningdek, sud bildirishnomalarining ochiq tizimiga ularning ismlarini kiritmaganligi uchun da’vo rad etilgan.
Nashr eslatishicha, Kim Chen In onasining singlisi javobgarlardan 60 million von (52 ming dollar) tovon puli talab qilgan. Uning ta’kidlashicha, ular KXDR yetakchisining xolasi plastik operatsiya qildirgani va Kim Chen Irning maxfiy jamg‘armasini boshqargani haqidagi uydirmalarni aytgan.
Izoh (0)