Futbol bo‘yicha JCh—2018 va Osiyo Kubogi—2019 saralashi doirasidagi Filippinga qarshi o‘yin arafasida O‘zbekiston milliy terma jamoasining besh nafar futbolchisida ogohlantirish bor.
Avvalroq, BAAning “Ash-Shabab” klubida to‘p suruvchi yarim himoyachi Azizbek Haydarov, avvalgi o‘yinlarda ikki sariq kartochka olgani sabab, Filippinga qarshi o‘yinni o‘tkazib yuborishi haqida xabar berilgan edi. Saralashning avvalgi uchrashuvlarida O‘zbekiston termasining boshqa yetakchilari ogohlantirilgan.
Jumladan, Yaman terma jamoasiga qarshi Toshkentda bo‘lib o‘tgan o‘yinda Odil Ahmedov va Javohir Sohibovga sariq kartochka ko‘rsatilgan. Bahraynga qarshi safar uchrashuvida Yegor Krimets hakam tomonidan ogohlantirilgan bo‘lsa, O‘zbekiston — KXDR o‘yinida Sardor Rashidov va Islom To‘xtaxo‘jayev sariq kartochkaga “loyiq ko‘rilgan”.
Nomlari keltirilgan futbolchilar Filippinga qarshi o‘yinda maydonga tushib, yaponiyalik referi Ryuji Sato tomonidan sariq kartochka bilan ogohlantirilsa, 29-mart kuni bo‘ladigan Bahraynga qarshi javob o‘yinini o‘tkazib yuboradi. Shunda, agar O‘zbekiston milliy terma jamoasi saralashning keyingi bosqichiga yo‘l olsa, yetakchi futbolchilar kartochkalardan tozalanib oladi.
Ma’lumot uchun, JCh—2014 saralashi doirasida ham O‘zbekiston milliy terma jamoasi bilan shunga o‘xshash holat yuz bergan edi. 2011-yil 15-noyabr kuni O‘zbekiston terma jamoasi saralashning 3-bosqichida Tojikistonni qabul qilganida, Aleksandr Geynrix, Odil Ahmedov, Sanjar Tursunov, Vagiz Galiulin, Islom To‘xtaxo‘jayev va Shavkat Mullajonov ogohlantirilgandi.Keyinroq FIFA vaziyatni o‘rganib chiqib, Aleksandr Geynrixdan boshqa barcha futbolchilar sariq kartochkani qasddan olgan, deb topgan hamda ularni qo‘shimcha yana bitta o‘yinga diskvalifikatsiya qilgan. Shundan so‘ng bu beshlik hal qiluvchi bosqichda Eron milliy terma jamoasiga qarshi dastlabki uchrashuvni o‘tkazib yuborgan, Toshkentda bo‘lgan shu o‘yinda O‘zbekiston termasi 0:1 hisobida imkoniyatni boy bergan.