Shvetsiyalik hujumchi Zlatan Ibragimovich futbol bo‘yicha Xitoy chempionatida to‘p surishga rozilik bildirsa, jahonning eng ko‘p maosh oladigan futbolchisiga aylanadi. Bu haqda, La Repubblica nashriga asoslanib, “Chempionat.com” xabar berdi.
Xitoyliklar shvetsiyalik yulduz futbolchi mamlakat Superligasining yuzi bo‘lishini istamoqda, bu yo‘lda ular, xabar berishlaricha, Zlatan Ibragimovichga yiliga 75 million yevro maosh to‘lashga rozi.
Ayni vaqtda Fransiyaning “PSJ” klubi sharafini himoya qilayotgan Ibragimovichga Xitoyning qaysi klubi taklif bilan chiqishi hozircha noma’lum. Biroq 34 yoshli hujumchini Xitoyga taklif qilish g‘oyasi bevosita mamlakat hukumatidan chiqqani aytilmoqda.
Ma’lumot uchun, Ibragimovich 2015/2016-yilgi mavsum davomida “PSJ” uchun Fransiya chempionatida 25 ta o‘yin o‘tkazib, 27 ta gol urishga muvaffaq bo‘ldi. Uning klub bilan shartnomasi 2016-yil yozida nihoyasiga yetadi.
Izoh (0)