Professional boksning WBA yo‘nalishi bo‘yicha amaldagi jahon chempioni Lukas Braun uning qoni tarkibida aniqlangan preparat yo‘talga qarshi dorida bo‘lganini ma’lum qildi, deb yozadi “Olamsport”.
Bunga qadar superog‘ir vazn toifasida chempionlik kamarini o‘zbekistonlik bokschi Ruslan Chagayevdan tortib olgan avstraliyalik charm qo‘lqop ustasi doping iste’mol qilganlikda shubha qilinayotgandi.
Lukas Braun bergan ma’lumotdan keyin Rossiya tibbiy qo‘mitasi raisining o‘rinbosari Eduard Bezgulov unga izoh berishga ham ulgurdi. Mutaxassisning so‘zlariga ko‘ra, doping bokschining organizmiga u aytib o‘tgan dori orqali tushishi mumkin emas.
“Bahonalar izlanayotganda odatda ikki xil vaj ko‘rsatiladi: yo yo‘tal dori, yoki go‘sht mahsuloti. Hozir suyuqlik haqidagi hikoya juda kulgili ko‘rinyapti. Birinchidan, Astraliyada klenbuterolli dorilar sotilmaydi. Ikkinchidan, jang oldi yoki keyingi qaydnomalarida yo‘taldan davolanish borasida gap-so‘z bo‘lmagan. Sportchi unda doping testgacha uch hafta davomida nimalar qabul qilganini ko‘rsatishi kerak. Boz ustiga, doridagi dozalar bolalarbop, ular jangdan so‘ng aniqlanmagan bo‘lardi”, — deydi Eduard Bezgulov.
Bezgulovning so‘zlariga ko‘ra, bunga qadar velopoygachi Alberto Kontador go‘sht mahsuloti orqali doping qabul qilgan bo‘lib, sportchi bu borada oqlanishga yaqin bo‘lgan. “Poygachining organizmiga doping go‘sht orqali tushishi mumkin edi. Lekin Kontadorni baribir diskvalifikatsiya qilishgan”, — deb aytib o‘tdi Rossiya tibbiy qo‘mitasi raisining o‘rinbosari.
Izoh (0)