23-mart, chorshanba kuni Bryusselda qo‘lga olingan erkak aeroportdagi portlashlarga aloqadorlikda gumon qilinayotgan Najim Laashraviy bo‘lib chiqmadi, deb yozadi “RBK” Belgiyadagi gazetalardan biriga tayanib. Erkakning hibsga olingani haqidagi xabarni ham aynan shu gazeta tarqatgan edi.
Uning ma’lumotlariga ko‘ra, hibsga olish jarayoni bugun ertalab Anderlext aholi punkti yaqinida sodir bo‘lgan. Ammo buni prokuraturadagilar tasdiqlamadi.
Laashraviyni aeroportdagi kuzatuv kameralari qaydlari orqali tanib olishdi, u yerda u teraktning boshqa ijrochilari deya taxmin etilayotgan aka-uka Bakraviylar bilan birga muhrlangan edi. U voqea joyini portlashlardan so‘ng darhol tark etgani taxmin qilingan edi.
Avvalroq Belgiyaning Derniere Heure gazetasi Bryussel aeroportidagi portlashlarni amalga oshirgan deb taxmin qilinayotgan shaxslarning fotosuratini e’lon qildi.
Eslatib o‘tamiz, oldinroq Bryussel aeroportidagi bombani aka-uka Bakraviylar portlatgani xabar qilingandi.
Politsiya ma’lumotlariga ko‘ra, aeroportdagi portlashga jami uch kishi aloqador bo‘lgan, ulardan ikki nafari halok bo‘lgan, uchinchisi aerovokzal binosidan qochib qolgan.
22-mart, seshanba kuni Belgiya poytaxtining aeroporti va metrosida qator portlashlar sodir etildi. Natijada, so‘nggi ma’lumotlarga ko‘ra, 36 kishi halok bo‘ldi, 230 kishi jarohat oldi.
Izoh (0)