AQShning Florida shtatidagi Martin okrugi politsiyasi BMW salonidan X6 yo‘ltanlamasini hamda boshqa avtomobillarga tegishli 60 dona kalitni o‘g‘irlab ketgan 36 yoshli Nikolas Jeksonni hibsga oldi. Motor nashrining bildirishicha, o‘g‘irlikdan bir kun oldin erkak yo‘ltanlamasni oziq-ovqat nafaqasiga sotib olishga harakat qilgan.
17-mart kuni Jekson avtosalonga kelib, kredit karta hamda ishsizlar va past daromadga ega fuqarolar uchun oylik oziq-ovqat nafaqasi tushiriladigan EBT kartasi yordamida to‘lovni amalga oshirmoqchi bo‘lgan. Salon xodimlari Jeksonning to‘lovini qabul qilmagan. Ertasiga erkak salonga o‘g‘irlikka tushgan va o‘zi bir kun muqaddam sotib olishga harakat qilgan mashinani olib qochib ketgan.
Lekin huquqbuzar uzoqqa qochib keta olmagan — yangi mashina baki deyarli bo‘sh edi, yoqilg‘i quyish uchun esa Jeksonning puli yo‘q edi. Natijada u Palm-Sitida politsiya qo‘liga tushdi.
Florida shtatida oylik oziq-ovqat nafaqasi 129 dollarni tashkil qiladi.
Oldinroq Minnesota shtatida 11 yoshli bola beton qoradigan mashinani olib qochib ketgani xabar qilingan edi.
Izoh (0)