Turkiya sharqida bungacha noma’lum bo‘lgan megalitik (ishlov berilmagan toshlardan yasalgan qadimiy inshoot) majmua aniqlandi, u tosh davridagi mudofaa inshooti bo‘lib chiqishi mumkin, deb yozadi “TASS” Yuzyunju Yil universiteti tarix professori Rafet Chavusho‘g‘liga tayanib. Noodatiy inshoot Eron bilan chegara yaqinidagi Van ko‘li yaqinida topilgan.
Qal’a vayronalarini eslatuvchi toshlar uyumi Yujelen aholi punkti yaqinida dengiz sathidan taxminan 2 ming metr balandlikdagi tepalik uchini egallagan.
“Obyektda poydevor qoldiqlarini ko‘rish mumkin, bu uning qo‘rg‘on ekanligidan darak beradi. Inshoot ushbu hududda uchraydigan ilk tosh asriga tegishli harbiy istehkomlarni eslatadi. U, shuningdek, minoraga o‘xshash jihatlarga ham ega, bu ushbu hududga xos xususiyat emas”, — dedi professor. Uning qo‘shimcha qilishicha, yanada to‘liqroq tasavvurga ega bo‘lish uchun kunlar isib, qorlar erishini kutish kerak.
Izoh (0)