O‘zMTRKning “Sport” telekanalida faoliyat ko‘rsatib kelgan sharhlovchi Davron Fayziyev UzReport telekanalida ish boshladi. Bu haqda UzReport xabar berdi.
UzReport telekanali dastlab futbol bo‘yicha Yevropa Chempionlar Ligasi, keyinroq futbol bo‘yicha Angliya Premyer-ligasi va Yevro—2016 uchrashuvlarini translyatsiya qilish huquqini qo‘lga kiritdi. Xabar berishlaricha, telekanal yaqin vaqt ichida futbol sharhlarini o‘zbek tilida efirga uzatishni ham yo‘lga qo‘yadi.
Bu yo‘lda telekanal rossiyalik bir qator taniqli sharhlovchilar — Aleksandr Shmurnov, Georgiy Cherdansev, Denis Kazanskiy, Aleksandr Yelagin kabilar bilan 2015-yilning 15-sentabridan 2016-yilning 31-iyuliga qadar kelishuvga erishgan bo‘lib, uchrashuvlarni sharhlash barobarida telekanal xodimlariga mahorat darslarini o‘tishi ham ko‘zda tutilgandi.
1983-yilda tavallud topgan Davron Fayziyev O‘zbekiston milliy universitetining jurnalistika fakultetini tamomlagan. U 2001-yildan buyon O‘zbekiston Milliy teleradiokompaniyasining avvaliga “Yoshlar”, keyin esa “Sport” telekanallarida faoliyat yuritib keldi.
Izoh (0)