Futbol bo‘yicha O‘zbekiston va Filippin terma jamoalari o‘rtasidagi 24-mart kuni bo‘lib o‘tadigan bellashuvni yaponiyalik hakamlar brigadasi boshqarib boradi. O‘FF rasmiy saytining ma’lum qilishicha, JCh—2018 va Osiyo Kubogi—2019 saralashi doirasidagi uchrashuv Sato Ryujiga ishonib topshirilgan.
World Referee statistikasiga ko‘ra, Sato Ryuji O‘zbekiston jamoalari ishtirokidagi beshta bellashuvda ishlagan. E’tiborli tomoni, ularning uchtasida durang natija qayd etilgan.
Xususan, yoshlar o‘rtasidagi 2014-yilgi Osiyo chempionatida Sato Ryuji hakamlik qilgan O‘zbekiston — BAA uchrashuvida 2:2 hisobi qayd etilgan. OChL—2015 guruh bosqichi doirasidagi “Lokomotiv” (O‘zbekiston) — “Fulad” (Eron) bahsida ham Ryuji hakamlik qilgan, o‘yin 1:1 hisobi bilan yakuniga yetgan.
Yaponiyalik referining O‘zbekiston jamoalari ishtirokidagi yana bir uchrashuvi 2015-yilning 27-mart sanasiga to‘g‘ri keladi. O‘shanda O‘zbekiston milliy terma jamoasi tarixda birinchi bor Janubiy Koreya bilan safarda durangga erishgandi. Tejonda o‘tgan o‘rtoqlik uchrashuvida 1:1 hisobi qayd etilgan.
2016-yil hisobidan Sato klublarimiz ishtirokidagi yana ikkita o‘yinda ishladi. 24-fevral kuni “Nasaf” Saudiya Arabistonida “Al-Ahli”dan 1:2 hisobida yengilgan bo‘lsa, 15-mart kuni “Lokomotiv” Eronda “Fulad Sepahon” ustidan zafar quchdi — 2:0.
Ma’lumot uchun, O‘zbekiston va Filippin milliy terma jamoalari o‘rtasidagi saralash uchrashuvi 24-mart kuni Toshkentdagi “Bunyodkor” stadionida bo‘lib o‘tadi. Uchrashuv Toshkent vaqti bilan soat 18:00 da boshlanadi.
Izoh (0)