Alisher Navoiy nomidagi O‘zbekiston Milliy bog‘ida Navro‘z umumxalq bayramiga bag‘ishlangan tantanalar bo‘lib o‘tdi, deya xabar beradi O‘zA.
21-mart kuni bayramona bezatilgan Alisher Navoiy nomidagi O‘zbekiston Milliy bog‘iga senatorlar va deputatlar, hukumat a’zolari, fan, madaniyat va san’at namoyandalari, ishlab chiqarish ilg‘orlari, tadbirkorlar, O‘zbekistonda faoliyat ko‘rsatayotgan xorijiy davlatlar elchixonalari va xalqaro tashkilotlar vakolatxonalarining vakillari, yoshlar tashrif buyurdi.
Soat 10:30 da maydonga O‘zbekiston Respublikasi Prezidenti Islom Karimov kirib keldi. Bayram tantanasiga yig‘ilganlar davlat rahbarini qarsaklar bilan kutib oldi.
Chorlov musiqasi yangragach, so‘z O‘zbekiston Respublikasi Prezidenti Islom Karimovga berildi. Prezidenti O‘zbekiston xalqi va mehmonlarni Navro‘z bayrami bilan muborakbod etdi.
Maydon uzra karnay-surnay sadolari yangrab, bayram boshlanganidan darak beradi. Mumtoz navolar xalq qo‘shiqlariga ulanadi. Chanqovuz, sibizg‘a kuylari yangrab, sahnaga folklor-etnografik ansambllar kirib keladi. Navro‘z sayli namoyish etiladi. Doshqozonlarda sumalak tayyorlanadi, tandirdan issiq nonlar uziladi, yigit-qizlar qo‘shiq aytib, raqsga tushadi.
Sahnaga bolakaylar kirib keladi. Maydon sho‘x-shodon kulguga to‘ladi. Ularning abjir harakatlari, xushchaqchaq kuy-qo‘shiqlari barchaga zavq-shavq ulashadi.
Maydonda jahon musiqalari yangraydi. Klassik opera va baletlar, turli tillardagi qo‘shiqlar bayram qatnashchilari, chet ellik mehmonlarga zavq bag‘ishlaydi.
Navro‘z tomoshalari ko‘tarinki ruhda davom etadi. Monitorlarda kurash, uloq-ko‘pkari, arqon tortish, tosh ko‘tarish, dorbozlik kabi zavqli an’analar namoyish etiladi. O‘lanchi va laparchilar dehqonchilikka baraka tilab, Navro‘z, tabiat haqida qo‘shiqlar aytadi.
Bayram tomoshasi qizigandan qiziydi. Estrada xonandalarining sho‘x-shodon qo‘shiqlari, jozibador raqslar yuraklarni jo‘shtiradi.
Navro‘z bayramini o‘nlab mamlakatlar aholisi sun’iy yo‘ldosh vositasida televideniye orqali tomosha qildi, internet orqali kuzatib bordi.
Izoh (0)