Rostov-Don aeroporti dispetcherlarining halokatga uchragan “Boing” uchuvchilari bilan suhbati audioyozuvi va uning matnli talqini “Parvozlar xavfsizligi” xalqaro maslahat-tahlil agentligi tomonidan e’lon qilindi. Bu haqda “Gazeta.ru” xabar bermoqda.
Unga ko‘ra, muloqot odatdagi tartibda kechgan, samolyot ekipaji bortda qandaydir nosozlik borligi haqida axborot bermagan.
Layner uchuvchisi ob-havo sharoiti haqida so‘ragan, bunga javoban dispetcher ekipajni kuchli shamol esayotgani, ko‘rish olti kilometrgacha cheklangani, kuchli yomg‘ir yog‘ayotgani va turbulentlik kuchli ekani haqida ogohlantirgan.
Shunga qaramay, dispetcher shamolning ko‘chishi haqida ogohlantirish yo‘qligini qo‘shimcha qilgan. Bunga javoban uchuvchi: “Oynaga qarasangiz, ser, ob-havo bilan bog‘liq vaziyat avvalgiga qaraganda yaxshiroqdek ko‘rinadi”, — deya qayd etgan.
Muloqot uchuvchining ikkinchi aylanaga ketish qarorini ma’lum qilishi bilan yakuniga yetadi. “Ikkinchi aylanaga ketdim, Sky Dubai 981”, — degan uchuvchi.
Shundan so‘ng dispetcher ikkinchi urinishda samolyotni qo‘ndirish uchun uchuvchiga bir necha ko‘rsatma beradi, shu bilan muloqot yakuniga yetgan.
Avvalroq FlyDubai aviakompaniyasi ijrochi direktori Geyt al-Geyt Rostov-Donda qulagan “Boing” uchuvchisi halokat signalini yo‘llamaganini ma’lum qilgandi.
Eslatib o‘tamiz, FlyDubai aviakompaniyasiga tegishli, Dubaydan Rostov-Donga uchayotgan “Boing” layneri 19-mart, shanba kuni Rostov-Don aeroportiga qo‘nishga urinish vaqtida halokatga uchragan edi. Hodisa oqibatida samolyot bortida bo‘lgan 62 kishining barchasi, xususan, O‘zbekiston fuqarosi halok bo‘lgan.
Izoh (0)