Germanwings samolyoti uchuvchisining psixiatrga shikoyatlardan iborat xati e’lon qilindi

Bild gazetasi Germanwings samolyoti uchuvchisi Andreas Lyubitsning o‘z psixiatriga yo‘llagan maktubini e’lon qildi, deb yozadi Meduza.

Xat Lyubits havo kemasini tog‘ga yo‘naltirib, aviahalokatni keltirib chiqarganidan ikki hafta avvalroq jo‘natilgan bo‘lgan.

Maktubda Lyubits ko‘z tekshiruvi natijalarini ma’lum qilgan. Ko‘rish qobiliyatining yomonlashishi sabablarini Dyusseldorfdagi universitet klinikasida aniqlashga urinishgan, ammo buni uddalay olishmagan.

Lyubits ehtimoliy ko‘rlik haqidagi xayollar unda vahima uyg‘otayotganidan shikoyat qilgan.

Germanwings uchuvchisiga antidepressantlar yozib berilgan, biroq ular uyqu bilan bog‘liq muammolarni yechishga yordam bermagan. Lyubits xatda aytishicha, mirtazapinning dozasi oshirilishi natijasida u yanada ko‘proq bezovtalana va uyqusizlikdan azob cheka boshlagan. Ba’zan, uchuvchining so‘zlariga ko‘ra, u umuman uxlay olmaydi, bunga erishganida esa, ketma-ket ikki soatdan ortiq uxlamaydi.

Bild ma’lumotlariga ko‘ra, aviahalokatdan avvalgi bir necha oy davomida Lyubits kamida 40 nafar shifokor huzurida bo‘lgan. Ularning ko‘pchiligi yigit psixologik xususiyatga esa muammoni boshidan kechirayotganini xulosa qilgan.

Eslatib o‘tamiz, 2015-yil 24-mart kuni Ispaniyaning Barselona shahridan Germaniyaning Dyusseldorf shahriga yo‘l olgan Germanwings aviakompaniyasining samolyoti Fransiya janubida halokatga uchragan edi. Oqibatda 150 kishi halok bo‘ldi. Tekshiruv vaqtida ikkinchi uchuvchi Andreas Lyubits samolyotni atayin qulatgani ma’lum bo‘ldi.