Italiyalik jarroh Serjio Kanavero boshni ko‘chirib o‘tkazish bo‘yicha birinchi sinov jarrohlik amaliyotiga qancha mablag‘ va kuch talab qilinishini hisoblab chiqdi. “RIA Novosti” agentligining ma’lum qilishicha, bunday amaliyotda 42 nafar jarroh qatnashadi, umumiy xarajatlar esa Rossiyada 10 million yevroni tashkil qiladi. Bu AQShda sarflanishi lozim bo‘lgan puldan ikki barobarga kamroqdir.
“Biz investitsiyalar uchun ochiqmiz. Men buni shunday tushuntiraman, negaki gap yagona jarrohlik amaliyotiga pul to‘plash emas, kelajak sari texnologik va tibbiy jihatdan katta qadam tashlash haqida ketmoqda”, — dedi Kanaveroning mijozi, rossiyalik dasturchi Valeriy Spiridonov.
Dastavval Kanavero, agarda amaliyot AQShda o‘tsa, unga 15—20 million yevro sarflanishini chamalagan edi. Ammo Spiridonov rossiyalik bo‘lgani bois bu davlat uchun sarf-xarajatlar boshqatdan hisoblab chiqildi.
Amaliyotda 42 nafar jarroh ishtirok etishi lozim bo‘ladi. Ular boshni ko‘chirish davomida kun bo‘yi, bir-birini almashtirgan holda ishlaydi. Tibbiyot xodimlarga to‘lanadigan haq 5 million yevroga yetishi mumkin.
Kanavero tomonidan yasalgan, asab tolalarini kesish va qaytadan ulash uchun qo‘llaniladigan asbob-uskunalarga 1 million yevro ketishi taxmin qilinmoqda.
Bundan tashqari, barcha tibbiyot xodimlari va zaruriy jihozlar sig‘adigan amaliyot xonasini topish asosiy muammo bo‘lib turibdi. Agarda bunday joy Rossiyada topilmasa, xarajatlar ikki karra oshib ketadi.
2015-yil fevral oyida italiyalik neyroxirurg Serjio Kanavero inson boshini ko‘chirib o‘tkazish bo‘yicha ilk operatsiyani 2017-yilda amalga oshirishni rejalashtirayotganini ma’lum qilgan edi. Bel mushaklari atrofiyasidan aziyat chekuvchi Spiridonov shifokor bilan Skype orqali muloqotda bo‘lgan. Ushbu kasallik bilan og‘rigan bolalarning 50 foizi 1 yoshdan oshmasligi aytiladi, biroq Spiridonov 31 ga kirgan va oliy ma’lumot olishi ham mumkin.
Valeriy Spiridonov o‘z boshini donor tanaga ko‘chirib o‘tkazishga rozi bo‘lgan. Operatsiyani italiyalik jarroh 2017-yilda o‘tkazmoqchi. U operatsiya uchun maxsus jamg‘arma ochgan bo‘lib, shu yo‘l bilan amaliyot uchun mablag‘ yig‘ilmoqda. Oxirgi ma’lumotlarga ko‘ra, nomi keltirilmagan homiylar inson boshini ko‘chirib o‘tkazish bo‘yicha operatsiyani amalga oshirish uchun 100 million dollar xayriya qilishga tayyor.
Izoh (0)