Buyuk Britaniya bosh vaziri Devid Kemeron agar britaniyaliklar Yevropa Ittifoqidan chiqishga ovoz bersa, mamlakat ittifoqni tark etishi va ikkinchi referendum o‘tkazish imkoniyati bo‘lmasligi haqida ogohlantirdi, deb xabar qiladi “TASS”.
Kemeron bu haqda Britaniya parlamentining quyi palatasidagi chiqishida ma’lum qildi. U o‘z chiqishi chog‘ida London shartlariga ko‘ra, YeIni isloh qilish haqidagi kelishuvni deputatlarga tanishtirdi. Kelishuv Yevroittifoqning 19-fevraldagi sammitida ma’qullangandi.
Uning aytishicha, ba’zi odamlar YeI tarkibidan chiqishni istamoqda, ammo aslida ular bu ovoz berishdan ittifoqda qolish uchun foydalanmoqchi.
“YeIda a’zo bo‘lib qolish bo‘yicha ikkinchi muzokaralar va ikkinchi referendum bo‘lmaydi”, — deb qayd etdi bosh vazir. Uning o‘zi Britaniyaning YeI tarkibida qolishi tarafdori hisoblanadi.
Kemeronning bayonoti London meri Boris Jonsonga o‘ziga xos javob bo‘ldi. Jonson kuni kecha bosh vazirni qo‘llab-quvvatlamasligi va kishilarni Yevroittifoqdan chiqishga da’vat etishini ta’kidlagandi. Ammo ba’zi siyosatchilar uning bayonotida Bryussel bilan munosabatlarni buzishni emas, 23-iyundagi referendumda saylovchilarni a’zolikka qarshi ovoz berishga ko‘ndirib, keyinroq London uchun yanada qulay shartlar asosida YeI bilan muzokara olib borish istagini ko‘rdi.
Izoh (0)