Hindiston shimolidagi tartibsizliklar oqibatida qurbon bo‘lganlar soni 19 kishiga yetdi
Hindiston shimolidagi Xaryana shtatida jat tabaqasi vakillari ishtirokidagi tartibsizliklar natijasida kamida 19 kishi halok bo‘ldi. Bu haqda “Interfaks” xabar beradi.
Yana 200 dan ortiq odam jarohat olgan.
Avvalroq jat tabaqasi vakillari hukumatdan davlat apparati va o‘quv muassasalarida ularga ko‘proq joy ajratishni talab qilib, namoyishlar o‘tkaza boshlaganligi haqida ma’lum qilingan edi.
Namoyishchilar Dehli shahrini suv bilan ta’minlab turuvchi kanalni to‘sib qo‘ygan edi. Natijada shahar maktablari yopilgan va suvni iste’mol qilish bo‘yicha me’yor joriy etilgan edi. Keyinroq hind harbiylari kanalni o‘z nazorati ostiga olgan edi.
Bundan tashqari, Xaryana va boshqa shtatlar o‘rtasidagi transport aloqalari buzilgan, mingdan ortiq temiryo‘l reyslari bekor qilingan.
Tartibsizliklar hududiga 1,2 ming harbiy xizmatchi yuborilgan.
