Damashqdagi portlashlar oqibatida kamida 30 kishi halok bo‘ldi
Suriyaning Damashq shahri janubida 21-fevral, yakshanba kuni kechqurun bir qator portlashlar natijasida kamida 30 kishi hayotdan ko‘z yumdi, deb xabar qiladi “Interfaks”.
Portlashlar shialar yashovchi Saida Zaynab dahasida sodir bo‘ldi. Suriyadagi inson huquqlari bo‘yicha kuzatuv kengashi kamida to‘rtta portlash yuz bergani haqida ma’lum qildi.
Bu ushbu dahada so‘nggi vaqtlarda yuz bergan birinchi terakt emas. 31-yanvar kuni Saida Zaynabda uchta portlash amalga oshirilgan va o‘shanda 70 dan ortiq odam halok bo‘lgandi. Terakt uchun javobgarlikni IShID terrorchilik guruhi o‘z zimmasiga olgan.
Eslatib o‘tamiz, 21-fevral, yakshanba kuni Suriyaning Xoms shahrida ham minalashtirilgan ikki avtomobilning portlashi oqibatida 50 ga yaqin odam nobud bo‘ldi.
