Rus pravoslav cherkovi yetakchisi patriarx Kirill Rim papasi Fransisk bilan uchrashuvga tayyorgarlik maxfiy tarzda olib borilgani sabablariga oydinlik kiritdi. Bu haqda u Lotin Amerikasiga safari yakunlari bo‘yicha Braziliyaning San-Paulu shahrida rossiyalik jurnalistlarga bergan intervyusi chog‘ida ma’lum qildi, deya xabar beradi “Interfaks”.
“Meni mazkur muloqotdan qaytarishga hech kim uringani yo‘q, chunki bu haqda deyarli hech kim bilmasdi ham. Bu uchrashuv haqida besh kishining xabari bor edi, ularning kimligini aytib o‘tirmayman. Nega bunday bo‘ldi? Chunki bunday muloqotni ochiq-oshkor tarzda tayyorlashning imkoni yo‘q, bunga qarshilik qiladiganlar nihoyatda ko‘p”, — deya ta’kidlagan Kirill.
Uning aytishicha, gap “uchrashuvning o‘zida qandaydir xavf bor” deb o‘ylaydigan pravoslavlarda ham emas. “Buni umuman istamagan qudratli kuchlar bor, shu sabab xotirjam va ortiqcha shovqin-suronsiz tayyorgarlik ko‘rish kerak edi, biz shunday qildik ham”, deya izoh bergan patriarx.
Eslatib o‘tamiz, oldinroq Rim papasi Fransisk ham Corriere della Sera gazetasiga bergan intervyusida uchrashuvga ikki yil davomida tayyorgarlik ko‘rilgani va maxfiy muzokaralar olib borilganini bildirgandi.
Izoh (0)