Marin Le Penning “Milliy front”i Rossiyadan 27 million yevro qarz so‘radi

Yetakchisi Marin Le Pen bo‘lgan Fransiyaning “Milliy front” partiyasi Rossiyaga 27 million yevro kredit ajratish to‘g‘risidagi iltimos bilan murojaat etdi. Bu haqda partiya g‘aznachisi ma’lum qilgan, deya xabar beradi Meduza.

G‘aznachining bildirishicha, kredit “Milliy front”ning 2017-yildagi prezidentlik va parlament saylovlaridagi ishtirokini moliyalashtirish uchun foydalaniladi.

Ma’lumotlarga ko‘ra, “Milliy front” 2014-yilda ham Rossiya bilan bog‘liq banklardan biridan 11 million yevro kredit olgan. Fransiya OAV va siyosatchilari Marin Le Pen Rossiyaning Ukraina masalasida tutgan yo‘lini oshkora qo‘llab-quvvatlagani uchun partiyaga mazkur mablag‘ berilganini taxmin qilgandi.