Jeyms Bondning “Spektr” filmidagi avtomobili 3,5 mln dollarga sotildi

Londonning Christie’s kimoshdi savdosida “007: Spektr” filmidagi avtomobil 2,4 million funt sterling (taxminan 3,5 million dollar) qiymatida sotildi. Bu haqda Meduza xabar qilmoqda.

Film qahramoni, britaniyalik maxsus agent Jeyms Bondning  Aston Martin DB10 rusumli avtomobilida 4,7 litr hajmdagi V8 benzinli dvigatel o‘rnatilgan. Mashina soatiga 306 kilometrgacha bo‘lgan tezlikda yura oladi.

2015-yil oktabr oyida jahon ekranlariga chiqqan “007: Spektr” filmi uchun jami o‘n dona DB10 avtomobili ishlab chiqarilgan. Suratga olish jarayonida ularning sakkiztasidan foydalanilgan. Yana ikkita mashina ko‘rgazmalarda namoyish etishga mo‘ljallangan bo‘lib, shundan bittasi kimoshdi savdosida sotildi.

Filmda Jeyms Bond rolini ijro etgan aktyor Deniel Kreyg eksklyuziv avtomobilda o‘zining dastxatini qoldirdi. Lekin, sertifikatlanmaganligi bois DB10 avtomashinasini odatiy yo‘lda boshqarish mumkin emas.