Gravitatsiya to‘lqinlari olimlarga Katta portlash yuz bergan vaqtdan buyon Olamni eshitish va uni tushunishga imkon beradi. Bu haqda Italiya yadro fizikasi milliy institutining katta ilmiy xodimi Yuriy Minenkov “TASS”ga ma’lum qildi.
“Gravitatsiya to‘lqinlari yordamida Katta portlashdan keyingi Olamimizni kuzatishimiz mumkin. Astronomiyadagi hech bir kanal bizning Olamimiz yaralishiga bunchalik yaqin kelib, kerakli ma’lumotni olishga qodir emas”, — dedi Minenkov.
Gravitatsiya to‘lqinlarini ochgan mualliflardan biri, Florida universitetida ishlovchi Sergey Klimenko Olam sirlarini tushunish uchun insoniyatda qo‘shimcha “sezgi” paydo bo‘lganini aytib o‘tdi.
“Endi biz ilgari hech qanday yo‘l bilan izlash imkoni bo‘lmagan signallarni izlay olamiz. Bu Olam haqida mutlaqo yangi bilimlarni beradi: u qanday yaralgan, uning evolyutsiyasi qanday kechgan. Astronomiyaning mutlaqo yangi turi ochiladi: gravitatsiya to‘lqinlari yordamida Olamni o‘rganish. Insoniyat yangi ‘sezgi’ga ega bo‘ldi: u nafaqat Olamni ko‘rishni, balki uni ‘eshitish’ni ham o‘rgandi”, — dedi Klimenko.
Olimning so‘zlariga ko‘ra, gravitatsiya to‘lqinlarini o‘rganish keyingi o‘n yilliklarda davom etadi. 2—5 yil ichida Yevropa, Yaponiya va Hindistonda yangi detektorlarni ishga tushirish rejalashtirilgan.
Eslatib o‘tamiz, 11-fevral kuni Milliy fan jamg‘armasi gravitatsiya to‘lqinlarining mavjudligi isbotini bir vaqtning o‘zida ikki – Luiziana va Vashington shtatlaridagi observatoriyalar tomonidan 2015-yilning 14-sentabr kuni qo‘lga kiritilganligini ma’lum qilgan edi.
Izoh (0)