Amerikaning to‘rtta F-22 strategik ko‘rinmas qiruvchi samolyoti Janubiy Koreyaga yetib keldi, deb yozadi “RIA Novosti” “Ryonxap” agentligiga tayanib.
17-fevral, chorshanba kuni Amerika qiruvchi samolyotlari Kyongido provinsiyasi Osan shahridagi AQSh harbiy bazasi ustidan pastlab uchib o‘tgan.
Avvalroq agentlik Seuldagi harbiy manbasiga tayanib, AQSh 17-fevral kuni Janubiy Koreyaga to‘rtta beshinchi avlod F-22 ko‘pnishonli qiruvchisini joylashtirishi haqida xabar qilgan edi. Ayni paytda AQSh bunday sinfdagi qiruvchi samolyotlarga ega yagona mamlakat bo‘lib qolmoqda. Boshqa mamlakatlar, jumladan, Rossiya, Hindiston va Xitoyning loyihalari hali ishlab chiqilmoqda.