Aktyor Javohir Zokirov “Ulug‘bek” nomli yangi tarixiy filmda suratga tushmoqda. Bunga dalil sifatida aktyor Facebook’dagi sahifasiga tarixiy siymo ko‘rinishidagi suratini joylashtirgan.
“Bu surat ‘Ulug‘bek’ nomli yangi tarixiy filmdan olingan. Man mazkur kartinada Abdulatif rolini ijro etyapman. Ammo hozircha bundan ortiq ma’lumot bera olmayman”, — dedi aktyor jurnalist Feruz Muhammadga bergan intervyusida.
Javohir Zokirovning Twitter va Instagram’dagi sahifalarida Xivadagi suratga olish ishlari jarayoni aks etgan ko‘plab suratlar va videolar e’lon qilingan. Suratlarda Gollivudda ijod qilgan rejissor Bahodir Yo‘ldoshev ham bor.
Surat va videolarda aktyor Ma’ruf Otajonovni ham ko‘rish mumkin. Otajonov 2015-yil noyabr oyida “Bekajon” gazetasiga bergan intervyusida uni “xorijlik rejissorlar suratga olayotgan <...> filmdagi Amir Temur roliga tasdiqlashgani”ni aytib o‘tgandi.
Suratga olish jarayonidan olingan alohida fotolar “Odnoklassniki” ijtimoiy tarmog‘ida ham tarqalgan.
2016-yil yanvarida ProToday nashri rejissor Bahodir Yo‘ldoshev YuNESKO bilan hamkorlikda Mirzo Ulug‘bek haqida film suratga olayotgani, filmda Alisher Navoiy obrazi ham bo‘lishi, obrazni fransiyalik mashhur aktyorni Armand Assante jonlantirishi haqida xabar bergandi.
Javohir Zokirovning Instagram’ida Armand Assante ishtirokida ham suratlar bor. Ulardan birining ostida aktyor shunday izoh qoldirgan: “Biz do‘stga aylandik! Filmda u mening otam rolini o‘ynaydi. Armand — aqlbovar qilmas darajada mehribon va haqiqiy inson. Orzular ro‘yobga chiqadi, Gollivud esa borgan sari yaqinlashmoqda!”.
https://twitter.com/jzakirov/status/680503429207318532
Ma’lumot uchun, Alisher Navoiyning o‘g‘li bo‘lmagan, Abdulatif esa Amir Temurning suyukli nevarasi — Mirzo Ulug‘bekning padarkush o‘g‘li edi.
Izoh (0)