Medvedev bosh vazir lavozimidagi faoliyatini “doimiy drayv” deb atadi

Rossiya bosh vaziri Dmitriy Medvedev kelajakda, rahbarlik lavozimlarini tark etgach, prezident va hukumat rahbari lavozimida ishlagan vaqtlari haqida batafsil gapirib berishini istisno qilmadi, deb yozadi “Interfaks”.

“Balki qachondir bu haqda batafsil so‘zlab beraman. Biroq hozircha ishlayapman, va bu qiziqarli ish”, — dedi Medvedev Euronews telekanaliga bergan intervyusida.

Uning ta’kidlashicha, ushbu yillar davomida ko‘plab yorqin xotiralar yig‘ilib qolgan. “Bu lavozim ham, unisi ham juda murakkab va jiddiy… Sakkiz yil davomida doimiy drayvda yashayapman. Mamlakat ichida ham juda ko‘plab hodisalar sodir bo‘ldi…” — dedi u.

Ushbu yillar davomida chet el yetakchilari bilan olib borilgan aloqalar haqida gapirar ekan, Medvedev “biz bahslashish va janjallashish bilan birga, nimalargadir ham erishdik” dedi va Strategik hujumkor qurol-yarog‘larni cheklash to‘g‘risidagi bitim tuzilganini tilga oldi.