Ostonada Markaziy Osiyodagi eng baland bino bo‘lishi rejalashtirilgan “Abu-Dabi Plaza” majmuida yong‘in ro‘y berdi (foto va video)

Qozog‘iston poytaxti Ostonada qurilishi yakunlanganidan so‘ng Markaziy Osiyodagi eng baland binoga aylanadigan “Abu-Dabi Plaza” majmuida yong‘in ro‘y berdi. Bu haqda “RBK” xabar bermoqda.

Qozog‘iston IIV favqulodda vaziyatlar qo‘mitasi rasmiy vakili Ruslan Imankulovning ma’lum qilishicha, 13-fevral, shanba, mahalliy vaqt bilan 04:40 da yong‘in haqida xabar berilgan, oradan 10 daqiqa o‘tib, o‘t o‘chiruvchilar hodisa joyiga yetib kelgan va alangani bartaraf etishga kirishgan.

Dastlabki taxminlarga ko‘ra, yong‘inga gaz ballonlarining portlashi sabab bo‘lgan. Binoning 25 qavati alanga olgani bildirilmoqda. Halok bo‘lganlar va jabrlanganlar haqida ma’lumot berilmagan.

“Abu-Dabi Plaza” qurilishi 2010-yil noyabrida boshlangan bo‘lib, shu yil oxirida yakuniga yetishi rejalashtirilgandi. Loyiha 1,6 milliard dollar baholangan.

https://youtu.be/S0H40QUvEQA