Twitter tvitlarni aks ettirish uchun yangi algoritmni taqdim etdi

Twitter ijtimoiy tarmog‘i lentadagi xabarlarning namoyish etilishining yangicha prinsipini joriy etdi. Bu haqda Twitter’ning Rossiyadagi matbuot xizmatiga tayanib, “RBK” xabar bermoqda.

Yangi algoritm quyidagi tartibda ishlaydi: ma’lum bir vaqt servisni ishlatmagan foydalanuvchi Twitter’ga kirganda, ijtimoiy tarmoq har biy foydalanuvchi uchun tanlab qo‘ygan eng muhim tvitlar teskari xronologik tartibda namoyish qilinadi.

Uning ostida esa qolgan tvitlar odatiy tartibda chiqib turadi. Xabarlar lentasining eski formatiga qaytish uchun foydalanuvchi sahifani yangilashi kifoya.

Yangi algoritmni faollashtirish uchun foydalanuvchilar sozlashlar bo‘limida “Avvaliga eng yaxshi tvitlarni ko‘rsatish” (Show me the best Tweets first) funksiyasini tanlashi lozim. Kompaniya matbuot xizmati ushbu funksiyani istagan vaqtda o‘chirish mumkinligini ma’lum qilmoqda.

Twitter’ning iOS, Android va desktop versiyasi foydalanuvchilari tez orada yangi funksiyadan foydalanishi mumkin bo‘ladi.

Eslatib o‘tamiz, 6-fevral kuni Twitter yaqin kunlarda yangi algoritm joriy etishi, unda tvitlar davriy tartibda emas, balki foydalanuvchi nimani ko‘rishni istashiga qarab chiqarilishi haqida xabar berilgandi. Ammo kompaniya rahbari Jek Dorsi bu xabarlarni rad etdi. Dorsi Twitter jamoasi servisni yanada jonliroq qilishga urinayotganini aytib, “Siz bo‘lmaganda” funksiyasining joriy etilishi ham shundan dalolat ekanligini aytgandi.