Mitroxin Putindan pavilyonlarni buzgani uchun Sobyaninni ishdan haydashni so‘radi
“Yabloko” partiyasi siyosiy qo‘mitasi a’zosi Sergey Mitroxin Rossiya prezidenti Vladimir Putinga xat yozib, Moskvada 9-fevralga o‘tar kechasi boshlangan pavilyonlarni buzish jarayonini to‘xtatishni so‘radi. Bu haqda “RBK” xabar berdi. U, shuningdek, Moskva meri Sergey Sobyaninni ishonchni yo‘qotgani uchun ishdan bo‘shatishga chaqirdi.
Maktubda aytilishicha, “Yabloko” partiyasi Moskva meriyasi Rossiya Konstitutsiyasida belgilab qo‘yilgan xususiy mulk huquqini qo‘pollik bilan buzmoqda, deb hisoblaydi. “Bir kechaning o‘zida ko‘plab kichik biznes subyektlari o‘z mulklaridan, savdo maydonlaridan, mahsulotlaridan, o‘n minglab fuqarolar esa, poytaxtdagi ish o‘rinlaridan ajraldi”, — deyiladi hujjatda.
Siyosatchi Putindan Moskva meriyasining o‘zboshimchalik bilan qurilgan deb hisoblangan pavilyonlarni buzish to‘g‘risidagi qarorini bekor qilishga, shuningdek, o‘z majburiyatlarini tegishli tarzda bajarmaganligi tufayli ishonchni yo‘qotgani uchun Sergey Sobyaninni Moskva merligidan ozod etishga chaqirdi.
