O‘zi sodir etmagan jinoyati uchun 60 yillik qamoq jazosiga hukm qilingan amerikalik erkak 6 million dollar tovon puli oldi. Tegishli qarorni 9-fevral, seshanba kuni Konnektikut shtatining Xartford shahri rasmiylari qabul qildi, deb xabar beradi “TASS”.
59 yoshli Migel Roman 1988-yilda 17 yoshli o‘quvchi qizni o‘ldirishda aydbor deb topilgandi. Maslahatchilar hay’ati o‘shanda prokuratura taqdim etgan dalillarni yetarli, deb hisoblagan.
Ammo 2008-yilda o‘tkazilgan takroriy DNK ekspertizasidan keyin Romanning jinoyatga aloqador emasligi aniqlandi va u ozodlikka chiqarildi.
20 yildan so‘ng ozodlikka chiqqan Roman Konnektikut rasmiylarini sudga berdi va 8,5 million dollar tovon puli talab qildi.
Yakunda rasmiylar da’vogar talab qilganidan 2,5 million dollar kamroq pul to‘lashga rozi bo‘ldi.
Haqiqiy qotil 2011-yilda ushlangan. U qilgan jinoyati uchun umrbod qamoq jazosiga hukm qilingan.
Izoh (0)