O‘zbekistonlik charm qo‘lqop ustalari Minsk (Belarus) hamda Bishkek (Qirg‘iziston) shaharlarida o‘tkazilgan an’anaviy xalqaro turnirlarda ishtirok etib, 3 ta oltin, 4 ta kumush va 2 ta bronza medaliga sazovor bo‘ldi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
Belarus poytaxtida o‘n to‘qqizinchi bor o‘tkazilgan xalqaro turnirda 17 davlat vakillari g‘oliblik uchun bahs yuritdi. Qizg‘in kechgan bellashuvlarning yakunlariga ko‘ra, Rustam To‘laganov (-91 kg) va Mirzohid Abdullayev (+91 kg) barcha raqiblari ustidan g‘alaba qozonib, birinchi o‘rinni egallagan bo‘lsa, Nodirjon Mirzaahmedov (-49 kg) va Shaxram Giyazov (-69 kg) kumush, Shaxobiddin Zoirov (-52 kg) esa bronza medaliga sazovor bo‘ldi.
2—7-fevral kunlari Bishkek shahrida bo‘lib o‘tgan xalqaro turnirda ham o‘zbekistonlik charm qo‘lqop ustalari munosib ishtirok etib, 1 ta oltin, 2 ta kumush va 1 ta bronza medalini qo‘lga kiritdi.
O‘zbekiston terma jamoasi hisobiga oltin medalni Isroil Madrimov (-75 kg) keltirgan bo‘lsa, Sardor Muzaffarov (-56 kg) va Ulug‘bek Mubinov (+91 kg) finalga qadar kechgan janglarni mag‘lubiyatsiz o‘tkazib, kumush medal sovrindori bo‘ldi. Yana bir sportchi Jasurbek Latipov (-52 kg) bronza medali bilan taqdirlandi.
Izoh (0)