Buxoroda yangi temiryo‘l vokzali qurilmoqda

Buxoroda temiryo‘l vokzalining yangi binosi qurilishi olib borilmoqda. Bu haqda “Gazeta.uz” xabar berdi.

Vokzalning 1902-yilda qurilgan eski bir qavatli binosi o‘tgan yil yozida buzilgan va o‘sha paytning o‘zida yangi binoning poydevori bitkazilib, qurilish boshlab yuborilgandi.

Yangi bino ikki qavatli bo‘ladi va bir paytning o‘zida 200 dan ziyod yo‘lovchiga xizmat ko‘rsatish imkonini beradi. Kutish zalidan tashqari, vokzalda VIP-zal, mehmonlar uchun dam olish xonalari, ona va bola xonasi, tibbiyot punkti va bufet bo‘lishi ko‘zda tutilgan.

Hozirga kelib vokzal devorlari ko‘tarilgan va tomi yopilgan. Perron qismi kengaytirilgan, imkoniyati cheklangan kishilar uchun maxsus yo‘laklar qurilgan. Bahorda favvora, chiptaxona va avtomobillar turargohi quriladi.

Yangi vokzal sentabrda foydalanishga topshirilishi rejalashtirilgan.