Parijdagi teraktlar tashkilotchisi Abdulhamid Abaud Yevropaga IShIDning yana 90 nafar jangarisi bilan birga kirib kelgan, deb yozadi “Yevropeyskaya Pravda” guvohlardan biriga tayanib.
Sonya ismi ostida yashirinayotgan guvoh ayol avvalroq politsiyaga Abaudni fosh qilgan, natijada u Fransiya politsiyasining Sen-Denidagi maxsus operatsiyasi chog‘ida yo‘q qilingan edi.
Ayolning aytishicha, u Abaud va uning xolavachchasi bilan Parijdagi hujumlardan bir necha kun o‘tib uchrashgan. Shunda terrorchi Yevropaga hech qanday hujjatlarsiz, 90 nafar boshqa jangari bilan qochoqlar orasida kelganini aytgan.
Amaldorlardan biri aytishicha, 50—60 ga yaqin jangari Yevroittifoqqa Gretsiya, Bolgariya va Ruminiya orqali kirib kelgan.
Guvoh ayolning so‘zlariga ko‘ra, Abaud Parij tashqarisidagi savdo markazi, politsiya uchastkasi va bolalar bog‘chasiga ham hujumlar uyushtirishni rejalashtirgan edi.
Eslatib o‘tamiz, Parijdagi teraktlar ketma-ketligi 13-noyabr oqshomida yuz berdi. Terrorchilar “Stad de Frans” stadioni yaqinida bomba portlatdi, bir qator restoranlar va konsert zalidagi tomoshabinlarga qarata o‘t ochdi. Qo‘poruvchilik harakatlari oqibatida 130 kishi halok bo‘lgan, 352 kishi yaralangan edi.
Izoh (0)