Ota-bola Google’ga noodatiy tarzda so‘rov jo‘natib, javob ham oldi (foto)

Ota-bola Timm va Mixael yozgi oromgohda dam olayotgan vaqtida Deichhörnchen so‘zi haqida ma’lumot kerak bo‘lib qoldi. U yerda internet bo‘lmagani sababli, ular Google’ga ushbu so‘rovni pochta orqali xat yozib yuborishga qaror qildi, deb yozadi “AdMe.ru”.

Yetti kun ichida ularga javob xati keldi, u ham qo‘lda yozilgan edi. Ular so‘ragan so‘z o‘rniga, Google xodimlari Eichhörnchen (olmaxon) so‘zini taklif qildi. Unda Google jamoasi o‘zini yo‘qotib qo‘ymasdan, vaziyatga hazil bilan yondashganini ko‘rish mumkin.

Taxminiy tarjimasi:

“Salom, Google.

Hozir bizda, afsuski, internet aloqasi yo‘q. Biz yozgi oromgohdamiz, ammo bir narsa bo‘yicha ma’lumot kerak edi. Bizni Deichhörnchen haqidagi barcha ma’lumotlar qiziqtiradi — u qanday mavjudot, qayerda yashaydi, nima bilan oziqlanadi. Biznesingiz reklama hisobiga mavjud ekanligini hisobga olib, uni xat ichida keltirishingizni so‘raymiz.

Oldindan rahmat!”

Google’ning javobi:

Taxminiy tarjimasi:

“Hurmatli Timm va Mixael!

So‘rovingiz uchun rahmat. Balki, siz Eichhörnchen’ni nazarda tutgandirsiz?

Quyida qidiruv so‘rovingizga bog‘liq rasmlar keltirilmoqda.

Wikipedia: Deichhörnchen — sohil olmaxoni, u kamyob tur bo‘lib, dambalar bo‘lmagani tufayli qirilib ketgan.

Reklama: Savollaringiz tug‘ilsa, Google’dan foydalaning. Iloji bo‘lsa, onlayn tarzda. Yozgi oromgohda vaqtingiz xush o‘tsin!

Google’ning oflayn jamoasi (beta-versiya).”