Fotogalereya: Futbolchilar tomonidan dabdalasi chiqarilgan eng qimmat avtomobillar

Rossiyaning “Sport-Ekspress” nashri mashhur futbolchilar ishtirokidagi eng shov-shuvli yo‘l-transport hodisalarini yodga oldi.

Maks Mayer

“Shalke”ning 20 yoshli yarim himoyachisi AQShda hordiq chiqararkan, 600 ming yevro turadigan Lamborghini bilan birga yo‘ldan uchib chiqib ketdi. Avtomobilni ta’mirlash ishlari 400 ming dollarga baholandi, biroq bu pulni sug‘urta qopladi. Futbolchi bor-yo‘g‘i 28 yevro jarima va 2 ming yevro soliq to‘ladi. Hodisa natijasida hech kim tan jarohati olmadi.

Artyom Milevskiy

Kiyev “Dinamo”sining yulduziga tegishli Maserati 2011-yilda yoqib yuborilgan bo‘lsa, 2013-yil uning 220 ming yevrolik Ferrari’siga jabr bo‘ldi. Dastlab, mashinani Turkiyadan olib kelishda uning old qismini pachoqlab qo‘yishdi. Futbolchi mashinani ta’mirlashga ta’mirladi-yu, biroq oradan ko‘p o‘tmay, avtomobilni qayta ta’mirlab bo‘lmaydigan ahvolga olib keldi: mast holda avtomobilni boshqarib, jiddiy yo‘l-transport hodisasiga uchradi.

Krishtianu Ronaldu

“Manchester Yunayted”da o‘ynab yurgan vaqtlarida, portugaliyalik futbolchi 300 ming dollar turadigan Ferrari’ni boshqara olmay, tonnel devoriga borib urildi. Mashina to‘liq ishdan chiqqan bo‘lsa-da, futbolchiga hech narsa qilgani yo‘q.

Andrey Shevchenko

“Milan”ning sobiq hujumchisi 2009-yili o‘zining 200 ming dollarlik Porsche Panamera Turbo avtomobilida avariyaga uchradi. YTHning ikkinchi ishtirokchisi — Honda jipini boshqarib borayotgan 24 yoshli hamshira “asosiy yo‘l” qoidasini unutib qo‘ygandi...

Andrey Yeshchenko

Andrey Yeshchenko “Kuban”da o‘ynab yurgan vaqtlari Nissan GT-R’ni soatiga 170 kilometr tezlikka olib chiqdi, yo‘ldan uchib chiqib, beton to‘siqni ag‘darib, ustunga borib urildi. Besh million rubllik mashina qoldiqlariga qarab, futbolchiga haqiqatan ham omad kulib boqqaniga ishonasan kishi.

Mario Balotelli

Italiya futbolining xulqi og‘ir bolasi kamida ikki marta avariyaga uchragan. “Manchester Siti”da o‘ynayotganida, uning “Bentli”si “MYu”ning 18 yoshli fanati boshqarib borayotgan avtomobil bilan to‘qnashib ketgandi. Italiyada esa, qizil chiroqda to‘xtab turishga sabri chidamay, gazni bosgan va Audi R8 ni rasvosini chiqargandi.

Balde Keyta

“Latsio”ning 19 yoshli futbolchisi 250 ming dollarlik Lamborghini Gallardo’da sayr qilayotgandi, biroq ertak uzoq davom etmadi: haydovchilik tajribasi ozligi sabab, futbolchi tezlikni oshirishi bilan, mashina devorga borib urilib, bir uyum metallga aylandi-qoldi.

Arturo Vidal

2015-yilgi Amerika Kubogi vaqtida chililik futbolchi Ferrari’sida “mingga qo‘yib” ketayotganida avariyaga uchradi. Ma’lum bo‘lishicha, u avtomobilni mast holda boshqargan.

Ueyn Runi

“Manchester Yunayted” hujumchisi o‘z avtomobillarining qadriga yetmaydi. U hozirga qadar turli yo‘l-transport hodisalarida 170 ming funtlik Aston Martin’ni, 65 ming funtlik Range Rover’ni, 40 ming funtlik Escalade’ni, shuningdek, qimmatbaho Lamborghini Gallardo’ning dabdalasini chiqargan.

Niklas Bendtner

“Arsenal”da o‘ynab yurgan kezlari, Bendtner mashg‘ulotga borarkan, xayolga berilib, yo‘ldan chiqib ketgan. Oqibatda uning Aston Martin’i ishdan chiqqan, o‘zi esa hozir “Volfsburg”da o‘ynayapti.