O‘zbekiston musulmonlari idorasi tashabbusi bilan Toshkent shahar hokimining 2015-yil 11-dekabrdagi qaroriga asosan Toshkent shahri Yashnobod tumanidagi “Jo‘rabek” jome’ masjidini yangidan qurish ishlari boshlandi. Bu haqda O‘zbekiston musulmonlari idorasi Axborot xizmati xabar bermoqda.
Mazkur masjidni barpo etish uchun Toshkent shahar arxitektura boshqarmasi tomonidan shaharsozlik me’yorlari va qoidalariga muvofiq ravishda namunali loyihasi ishlab chiqildi.
O‘zbekiston musulmonlari idorasi Axborot xizmati “Jo‘rabek” jome’ masjidi boylar tomonidan qayta qurilayotgani haqida tarqalgan mish-mishlarni rad etdi.
“‘Masjidini falon boyvachcha yoki xorijdagi falonchi boy quryapti’ degan mutlaqo asossiz xabarlar tarqatilmoqda. Bu gaplar asliyat va voqelikka butunlay mos kelmasligi shundoq ko‘rinib turibdi. Chunki hamma ko‘rib turibdi-ku, ushbu masjidni yangidan barpo etishga diniy idora tashabbus qilyapti, Toshkent shahar hokimiyati esa yer ajratish ishlariga amaliy ko‘mak va bunyodkorlik ishlariga moddiy yordam bermoqda. Shuningdek, bunday bunyodkorlik ishiga barcha mutasaddi tashkilotlar o‘z hissalarini qo‘shmoqda. Qolaversa, azaliy qadriyatimiz bo‘lgan hashar yo‘li bilan xalqimiz ham ko‘makchi bo‘layotir”, — deyiladi O‘zbekiston musulmonlari idorasi Axborot xizmati xabarida.
Eslatib o‘tamiz, 2015-yilning 25-aprelidan 26-aprelga o‘tar kechasi Yashnobod tumanidagi “Jo‘rabek” jome’ masjidida yong‘in sodir bo‘lgandi. Bunga kuchli shamol natijasida masjid tomidan o‘tgan elektr simlarining qisqa tutashuvi sabab bo‘lgan. Oqibatda masjidning asosiy qismi joylashgan bino yonib ketgan. Yong‘indan ma’muriy xonalar joylashgan kichik bino va tahoratxonani saqlab qolishga erishilgan.
Izoh (0)