Bloomberg agentligining qayd etishicha, Rossiyadan kelgan xabarlar tufayli etalon markadagi neft narxi birdan ko‘tarildi. Bu haqda “Korrespondent.net” xabar qilmoqda.
Mart oyidagi fyucherslar uchun Brent markasidagi neft narxi 1,93 dollarga oshib, barreliga 35,03 dollarni tashkil etdi.
WTI markasidagi neft narxi 1,62 dollarga o‘sib, barreliga 34,12 dollardan savdo qilindi.
Bunga Rossiya energetika vaziri Aleksandr Novakning aytgan so‘zlari sabab bo‘ldi. Uning so‘zlariga ko‘ra, Saudiya Arabistoni OPEKning oldingi uchrashuvlarida tashkilot a’zolaridan neft qazib olishni besh foizga qisqartirishni taklif qilgan.
Eng oxirgi prognozlarga ko‘ra, Brent markasidagi neft narxi 2016-yil oxiriga borib barreliga 70—75 dollarga yetishi mumkin. Oldinroq treyderlar neft narxi o‘zining eng pastki ko‘rsatkichini qayd etib bo‘lgani, yil oxiriga borib neftning bir barreli 50 dollarga yetishini ma’lum qilgandi.
Boshqa tahlilchilarning fikricha, agar Saudiya Arabistoni va Eron o‘rtasidagi mojaro “issiq” urushga aylanib ketsa, neft narxi barreliga 250 dollargacha yetishi mumkin.
Izoh (0)