Britaniyalik aktyor Jozef Fayns “Elizabet, Maykl va Marlon” komediyasi uchun Maykl Jekson roliga tanlangani ijtimoiy tarmoq foydalanuvchilari o‘rtasida bahslarga sabab bo‘lmoqda. Bu haqda Express xabar berdi.
Ko‘pchilik bunday qaror qora tanlilarga nisbatan haqorat ekani, chunki xonanda afroamerikalik oilada tug‘ilganini qayd etgan. Ayrim foydalanuvchilar esa bo‘lajak filmni boykot qilishga chaqirgan.
Aktyorning o‘zi ET Online’ga bergan intervyusida pop qirolini o‘ynash haqidagi taklifdan taajjubga tushganini tan olgan. “Men kabi londonlik oq tanli yigit uchun bu qiziq holat va o‘zim ham boshqa barcha kabi hayratdaman”, deya izoh bergan u.
“Elizabet, Maykl va Marlon” real voqealarga asoslangan. Marlon Brando va Elizabet Teylor Nyu-Yorkda bo‘lib o‘tayotgan Maykl Jeksonning konsertiga bormoqchi bo‘ladi. Ularning tashrifi terrorchilar hujumiga to‘g‘ri keladi, shu sababli aktyorlar xonanda bilan birga ijaraga olingan avtomobilda shahardan San-Fransiskoga qochishga qaror qiladi.
Izoh (0)