2016-yilning 28-yanvar kuni Xitoy Xalq Respublikasida amaliy tashrif bilan bo‘lib turgan O‘zbekiston Respublikasi tashqi ishlar Vaziri Abdulaziz Kamilov Pekin shahrida Shanxay hamkorlik tashkiloti Bosh kotibi Rashid Alimov bilan uchrashdi. Bu haqda O‘zbekiston TIV matbuot xizmati xabar bermoqda.
Vazir Rashid Alimovni Bosh kotib lavozimini bajarishga kirishganligi bilan tabriklab, Tashkilot doirasida a’zo davlatlar hamkorligini yanada rivojlantirishda ShHT Kotibiyatining muhim rol o‘ynashini ta’kidladi.
Bosh kotib O‘zbekiston raisligi ostida ShHT Xartiyasi va boshqa asosiy hujjatlarda belgilangan maqsad va vazifalarni amalga oshirish borasidagi izchil tadbirlarni yuqori baholadi.
Uchrashuv davomida Shanxay hamkorlik tashkiloti 2001-yilda tashkil etilgan vaqtidan boshlab jahon siyosatida sezilarli rol o‘ynovchi nufuzli xalqaro tuzilmaga aylangani qayd etildi. A’zo davlatlarning birgalikdagi sa’y-harakatlari bilan siyosiy, savdo-iqtisodiy, investitsion, transport-kommunikatsiya va madaniy-gumanitar sohalardagi ko‘p qirrali hamkorlik amalga oshirilmoqda.
Suhbat davomida 2016-yil iyun oyida Toshkent shahrida ShHT Davlat rahbarlari kengashining navbatdagi majlisini va joriy yildagi boshqa asosiy tadbirlarni o‘tkazishga tayyorgarlik jarayoni amaliy jihatdan muhokama qilindi.
Izoh (0)