Rossiyada “Dunyo Miss Universiteti” nomiga da’vogarlardan biri atrofida haqiqiy shov-shuv yuzaga keldi, deb yozadi “Nur.kz”.
Tanlov Xitoyda bo‘lib o‘tmoqda, u yerga Boshqirdistondan Anastasiya Yakovleva ismli talaba qiz jo‘nadi. Biroq ma’lum bo‘lishicha, u o‘z vatani emas, balki Qozog‘iston vakilasi sifatida qatnashmoqda. Qiz ijtimoiy tarmoqlarga joylayotgan suratlarida o‘zi vakillik qilayotgan mamlakat — Qozog‘iston nomi tushirilgan tasmani taqib olgan, biroq, go‘yoki uyalib, yozuvni qo‘li bilan to‘sib turganini ko‘rish mumkin.
Xitoyga borishi kerak bo‘lgan yana bir model Yeva Chashinskaya keyinroq ijtimoiy tarmoqlarda xabar berishicha, unga O‘zbekiston nomidan ishtirok etishni taklif qilishgan, biroq u tanlovda qatnashishdan bosh tortgan.
“Miss Boshqirdiston” model agentligi rahbari Luiza Zakiryanova bunday holat go‘zallik tanlovlarida tez-tez kuzatilishini ta’kidladi. Uning aytishicha, tanlov tashkilotchilari Rossiya uchun ajratilgan kvota to‘lgani, undan vakil borligini aytib, boshqa mamlakat nomidan qatnashishni taklif qilgan. Zakiryanovaning Anastasiya Boshqirdiston nomidan qatnashishi haqidagi so‘roviga ijobiy javob berishgan, biroq Xitoyga borgach, uni Qozog‘iston vakilasi sifatida ro‘yxatga olib qo‘yishgani ma’lum bo‘lgan.
Ayni paytda qiz Xitoydagi tanlovda qatnashmoqda, u o‘z xatti-harakatlarini uyga qaytgach izohlab berishini kutishmoqda. Tanlov finali 27-yanvarga belgilangan.
Izoh (0)