2014-yilda Braziliya prezidentligiga nomzod Eduardu Kampusning halok bo‘lishiga olib kelgan aviahalokatning sabablaridan biri uchuvchining charchaganligi bo‘lgan. Bu haqda halokat sabablari to‘g‘risidagi hisobotga tayangan mahalliy nashrlar xabar bermoqda, deb yozadi “TASS”.
Hisobotdagi asosiy xulosaga ko‘ra, hodisa uchuvchining bir qator xatolari tufayli yuzaga kelgan. Mutaxassislar havo kemasi komandiri Markus Martins qo‘nish uchun tezlikni ancha oldin pasaytirgan, deb hisoblamoqda.
O‘ziyozardagi Martinsning ovozini o‘rgangan ekspertlar, uchuvchi kuchli charchoqni his qilganini aniqladi. Uchuvchi hodisadan bir muddat oldin ijtimoiy tarmoqlar orqali surunkali charchoqdan shikoyat qilgan. Bundan tashqari, Martins ushbu modeldagi samolyotni boshqarish uchun yetarli darajada tajribaga ega bo‘lmagan. Aviahalokatdan keyin Braziliyaning fuqaro aviatsiyasi milliy agentligi uchuvchilarni tayyorlashdagi bir qator talablarni o‘zgartirdi.
Yana shu narsa ma’lum bo‘ldiki, ikkinchi uchuvchi Jeraldu Majela Barboza va havo kemasi komandirining munosabatlari yaxshi bo‘lmagan.
2014-yil 13-avgust kuni Rio-de-Janeyrodan uchgan xususiy Cessna 560 XL samolyoti Guarulyos aeroportining qo‘nish yo‘lagiga kirish arafasida turar-joy dahasiga qulab tushdi. Samolyot bortida Eduardu Kampus va uning saylovoldi kampaniyasidagi tarafdorlari bo‘lgan. Aviahalokat natijasida 49 yoshli siyosatchi va yana olti kishi, jumladan, ikki uchuvchi ham olamdan o‘tdi. Halokat vaqtida yerda bo‘lgan 10 kishi ham jabrlandi.
Izoh (0)