Shimoliy Dakotadagi neft narxi 0 dollardan ham tushib ketdi
Flint Hills Resources kompaniyasi, agar unga har barreli uchun 0,5 dollardan to‘lashsa, North Dakota Sour turidagi neftni olishga roziligini bildirdi. Bloomberg’ning qayd etishicha, 2014-yil yanvarida bu turdagi neft narxi 47,6 dollarga teng edi, 2015-yil yanvarigacha esa uning bir barreli 13,5 dollargacha arzonlashdi.
North Dakota Sour neftning sifati haddan tashqari past, oltingugurt miqdori ko‘p bo‘lgan turi hisoblanadi. Dallasdagi Turner Mason kompaniyasi vitse-prezidenti Jon Auersning so‘zlariga ko‘ra, Enbridge kompaniyasi 2011-yildan o‘z quvurlari orqali oltingugurt miqdori ko‘p bo‘lgan neftni o‘tkazishni to‘xtatib qo‘ygan va shu sababli uni yuk mashinalari va temiryo‘l yordamida olib chiqishga to‘g‘ri kelmoqda, bu esa xarajatlarni oshishiga sabab bo‘lmoqda.
Shimoliy Dakotada bir kunda qazib olinayotgan neftning faqat 15 ming barreli North Dakota Sour ulushiga to‘g‘ri keladi. Taqqoslash uchun, shtatning g‘arbiy qismida joylashgan Bakken slanets konida kuniga 1,1 million barrel neft qazib olinmoqda — bu neft tarkibida oltingugurt miqdori kam.
Tarkibida oltingugurt miqdori ko‘p bo‘lgan neft turi nisbatan arzon turadi, chunki uni qayta ishlash uchun maxsus asbob-uskuna kerak. Bloomberg’ning qayd etishicha, 2015-yili neft va gaz qazib olish bo‘yicha Kanadaning markazi hisoblangan Edmontonda uch oy davomida propan manfiy narxda sotildi, ya’ni, sotuvchilar mahsulot olinayotgani uchun xaridorga pul to‘ladi.
Auersning fikricha, agar ishlab chiqaruvchi undan neftni sotib olishlari uchun xaridorga pul to‘lashga majbur bo‘layotgan bo‘lsa, uning oldida faqat bir yo‘l qoladi — neft qazib olishni to‘xtatish kerak.
