Checheniston milliy siyosat, tashqi aloqalar, matbuot va axborot vaziri o‘rinbosari Lema Gudayev ijtimoiy tarmoqlarda “Ramzan Qodirov — Rossiya iftixori” nomli aksiya boshlanganini ma’lum qildi. Meduza’ning yozishicha, Gudayev Checheniston “jurnalistlar hamjamiyati va jamoat tashkilotlari vakillari” nomidan chiqish qilgan.
Ramzan Qodirovning sobiq matbuot kotibi hisoblangan Gudayev Checheniston rahbariga nisbatan “to‘la miqyosli axborot urushi”ni boshlagan “tizimdan tashqari muxolifat vakillarining axborot xurujiga qarshi yagona frontga qo‘shilish”ga chaqirgan.
“Ushbu axborot hujumlari nafaqat Checheniston rahbariga, balki davlatimiz rahbariyati va milliy yetakchimiz — Rossiya prezidenti Putinga qarshi qaratilgan”, — dedi Gudayev.
Ramzan Qodirov 12-yanvar kuni tizimdan tashqari muxolifat vakillariga “xalq dushmani” va “sotqinlar”dek munosabatda bo‘lish lozimligi va “qo‘poruvchilik faoliyati uchun” ularni sud qilish zarurligi haqida fikr bildirgan edi.
Muxolifat vakillari va huquq himoyachilari Rossiya Bosh prokuraturasidan Qodirovning so‘zlariga munosabat bildirishni talab qildi. Sankt-Peterburg qonunchilik kengashi deputati Maksim Reznik Checheniston rahbarining so‘zlarini ekstremizm yuzasidan tekshirishni so‘rab, Bosh prokuraturaga murojaat tayyorladi.
Krasnoyarsk shahar kengashi deputati Konstantin Senchenko Qodirovning “Rossiya isnodi” deb atadi.
Izoh (0)