Norma: jamoat joylarida chekkanlik uchun javobgarlikka faqat ichki ishlar idoralari tortishi mumkin
O‘zbekistonda 2015-yil 30-dekabrdan boshlab jamoat joylarida chekkanlik uchun jarimalar joriy etilgani munosabati bilan mazkur jarimalarga tortilmaslik uchun qaysi hududlarga chekish mumkinligi, chekayotgan shaxs qonunni qasddan buzayotganda qanday yo‘l tutish kerakligi kabi savollar paydo bo‘lmoqda. Norma ularga javob berib, masalaga oydinlik kiritgan.
Qonunda man etilmagan joylarda chekish mumkin: bu o‘z xonadoni, avtomobil, jamoat joyidagi tamaki mahsulotini iste’mol qilishga maxsus ajratilgan maydon yoki xona bo‘lishi mumkin. Javobgarlikka faqat ichki ishlar idoralari tegishli bayonnomani rasmiylashtirgan holda tortishi mumkin. Agar bayonnomada bildirilgan holatlarga qo‘shilmasangiz, buni sudda bildirish huquqiga egasiz.
Ish joyida muassis yoki u tomonidan vakolat berilgan shaxs qaroriga ko‘ra ajratilgan joylarda chekish mumkin. Ularni ajratish ish beruvchi va bino egasining majburiyati emas, balki huquqidir. Agar ular bunday joylarni ajratishdan bosh tortsa, hech kim bunga majbur etolmaydi.
Kashandalarning zararli odatidan aziyat chekayotganlarga ularga jamoat joylarida chekish man etilganini eslatish, mabodo bundan naf chiqmasa, hududingizga biriktirilgan ichki ishlar xodimlariga murojaat etish tavsiya etiladi.
