Dastlabki ma’lumotlarga ko‘ra, 28 yoshli Rakel Santosga mimik ajinlarni yo‘qotish uchun mo‘ljallangan Potenay dorisi yuborilgach, uning yuragi huruj qilib qoldi. Bu haqda The Daily Mail nashri bergan ma’lumotlarga asosan “Nur.kz” xabar qilmoqda.
Ma’lum qilinishicha, operatsiyadan keyin qiz yuragi qattiq ura boshlaganidan va havo yetishmayotganligidan shikoyat qilgan. Santos shifoxonaga yotqizilsa-da, shifokorlar uning hayotini saqlab qola olmadi.
Modelning o‘limiga olib kelgan hodisa sabablari bilan Rio-de-Janeyro politsiyasi shug‘ullanmoqda va buning uchun qizning dafn marosimi kechiktirildi. Tergovchilarning gumon qilishicha, qizning taqiqlangan dorilarni iste’mol qilib kelishi fojiaga sabab bo‘lgan.
Santosning yigiti Jilbertu Azevedoning ma’lum qilishicha, qiz ko‘p sigaret chekib, Potenay dorisini muntazam qabul qilib kelgan. Santosga xizmat ko‘rsatgan plastik xirurg Vagner Moraish esa, bajarilgan amaliyotni oddiy va xavfsiz ekanligini bayon qilib, o‘zini aybdor deb tan olmadi.
Shifokorning ta’kidlashicha, bemor ayrim turdagi dori-darmonlarni qabul qilib kelganligini va ashaddiy kashanda ekanligini undan yashirganligi oqibatida vaziyat murakkablashib ketgan.
Rakel Santos 2015-yil dekabr oyida Musa do Brasil go‘zallar tanlovida ikkinchi o‘rinni egallagan. Uning 7 va 13 yoshli ikki nafar o‘g‘li onasiz qoldi.
Izoh (0)